 |
| هام جدا |
إقرأ هذه المعلومات المهمة التي قدمتها لك مؤسسة الحاوي قبل متروح تعمل أي مقابلة في شركة سفريات للخارج
اللي قرر بإذن الله يسافر للعمل خارج مصر قبل ميعمل أي حاجة يقرأ هذه السطور المهمة
@@@@هــام جدا جدا جدا جدا يرجى القراءة لآخر السطر@@@@
بالنسبة للي ربنا كرمه ورايح مقابلة أو إتقبل بدون مقابلة من مكاتب التوظيف والسفريات لإلحاق العمالة بالخارج التي موجودة في جمهورية مصر العربية
::: تنبيه :::
مفيش حاجة اسمها شركات توظيف أو سفريات معتمدة في مصر .. كل الشركات تحتمل الصواب وتحتمل الخطأ خد بالك من ده جدا .. والمعلومات والنصائح دي لأي حد رايح مقابلة في أي شركة توظيف أو سفريات في مدن جمهورية مصر العربية جميعا .. ونسألكم الدعاء
إذا قبلوك بفضل الله بدون مقابلة شخصية أو إتقبلت في المقابلة الشخصية اللي رحتها بفضل الله .. واتصلو بيك عشان تجهز ورقك للسفر .. هتعمل ورق النت ب 200 جنيه وبعدين يودوك تعمل تحليل دم في المعمل وتدفع 120 جنيه وتروح بعدها مركز جامكا عند قسم قصر النيل ويختارولك مستشفى خاص تكشف فيها وتدفع 375 جنيه تقريبا وبعدها لو لاقدر الله طلع في الكشف حاجة هيتصلو بيك بعد يومين وبعدين تروح مكتب التوظيف وتديلهم فيش تشبيه موجه الى الدولة اللي رايحها وهايخدو منك المؤهل عشان هيوثقوه عند الممثلية السعودية وتدفع 150 جنيه ولازم يكون المؤهل متوثق من الخارجية المصرية قبل كده وشهادة الخبرة كذلك ومتدفعش فلوس في الوقت ده وهياخدو منك جواز سفرك عشان يحطو عليه التأشيرة ولازم تكون مسمى الفيزا اللي جيالك مطابقة للمؤهل اللي معاك عشان متتعبش ومتتبهدلش يعني مؤهلك طبيب يبقى مسمى الفيزا طبيب .. مؤهلك آداب جغرافيا شعبة مساحة يبقى مسمى الفيزا مساح .. والا هتقع في مشاكل وجوازك يترفض من القنصلية السعودية بسبب عدم مطابقة المؤهل لمسمى التأشيرة وبعدين يقولك لو لاقدر الله حصل كده هخلصهالك وتدفعلي 4000 جنيه وكده !! فلازم عشان متقعش في الحوسة الكبيرة دي لازم يكون مؤهلك مطابق لمسمى التأشيرة .. والتأشيرة بتزل على الجواز خلال 10 ايام تقريبا يعني وبعدها تدفع عمولة المكتب وهيا بتكون مرتب شهر اللي هتاخده في الدولة اللي هتشتغل فيها .. نصيحة متدفعش فلوس إلا لما التأشيرة تنزل على الجواز ولازم تساومه لحد مينزل ثمن العمولة ومتدفعش كده وخلاص أوك يا بشمهندسين
نصائح التعاقد للمهندسين الجدد وأي مهنة أخرى فى السعودية..
أنا لاقيت بوستات كتير بتسأل عن موضوع العقود و الاتفاقيات فى العروض اللى بتيجى للناس اللى أول مره تيجى السعوديه و خصوصا المهندسين , و عشان كده انا قولت اقول شوية نصايح للناس عشان تكون فاهمه راسها من رجليها و تقدر تقرر على حسب ظروفها :
1- أنا مهندس خريج 2011 , و شغال فى شركه اقل من المتوسط , و ده بسبب ان الانترفيو حصل فيها تدليس و غش كتير .
2 -مكاتب السفر كل همها الفلوس اللى هتاخدها منك , و احيانا من الكفيل , فمش فارق معاها مصلحتك ايه
أفضل المدن من حيث العمل هى جدة , الدمام , الرياض ... والله أعلى وأعلم -3
4- أي وعود مش مسجله فى عقود اعرف انها مش هتتنفذ , العقد لازم يكون فيها كل حاجه هتتفق عليها بلا استثناء , و يكون مسجل من الغرفه التجارية السعودية - على حسب مدينة عملك - , لان غير كده مكتب العمل مبيعترفش باى حاجه , حتى لو عقد ممضى عليه من الطرفين بس مش مسجل .
5- وانت فى مصر عندك الفرصه تحط كل شروطك , لما توصل السعودية اللى اتفقت عليه و اتكتب فى العقد هو اللى هيتنفذ , اى حاجه غير كده ابقى قابلنى .
6- بالنسبه للمهندسين من حديث التخرج لحد خبره سنتين , متقبلش ابدا باقل من 5 الاف ريال صافى راتب غير سكن و سياره يكونو مكتوبين صراحة فى العقد , اما لو هيديك راتب Full package متقبلش اقل من 7 الاف ريال , و على فكره هما دلوقتى بيحاولو يستغلوا الظروف و يخلوا الراتب 3500 و لو Full package بيحاولو يخلوه 5 الاف بس و يحملوك مصاريف الاقامه و النقابه و دى حوالى 5 الاف سنويا يعنى مرتب شهر .
7- قبل ما تيجى لازم تتاكد ان الكفيل مش نطاق احمر او اصفر , لانه لو فى النطاقين دول مفيش اقامه هتطلع و لا اى حاجه و هتدخل فى حوارات مالهاش اى تلاتين لازمه
8- تذاكر الطيران و رسوم الاقامه و التأمينات و كل المصاريف ليها علاقه بالحكومة السعودية على حساب الشركة او الكفيل , لو حاول يحملهالك ارفض و قوله قانونكم بيقول ان المصاريف بالكامل عليك - الجوازات , التأمين الصحى , رخصة السيارة , الاقامه , رسوم التجديد السنوية , اى مصاريف اخرى مستحدثه - و يتكتب الكلام ده صراحة فى العقد .
9- اللى يقدملك عرض و يقولك هو ده العقد و دى فورم ثابت و بعد كده هنتفق و هنغير و بتاع متصدقوش .... ده كداب وش !!
10- اى زيادات راتب تتسجل فى العقد , اللى يقولك فى نظام نقط و تميز و زيادات ثابته تبع لائحه الشركة .... ده كداب وش !!
ليست هناك تعليقات:
إرسال تعليق